آخر اليوم الدرج فيه فلوس، والبرنامج بيقول رقم تاني. الفرق ده ممكن يكون غلطة في الفكة، أو خصم اتعمل من غير إذن، أو فلوس طلعت ومااتسجلتش. المهم إنك تعرف — وده بيحتاج نظام تقفيل واضح مش ثقة وبس.
1. كل كاشير ليه وردية باسمه
لما أكتر من حد يشتغلوا على نفس الدرج من غير ورديات، أي عجز بيبقى «مش أنا». كل واحد يفتح ورديته بمبلغ البداية ويقفلها هو.
2. القفل الأعمى
الكاشير يعدّ الفلوس اللي في الدرج ويكتب الرقم، من غير ما يشوف البرنامج متوقع كام. لو شاف الرقم المتوقع الأول، سهل يظبط العدّ عليه. المدير بس هو اللي يشوف الفرق.
3. الفيزا والمحافظ لوحدهم
اجمع إجمالي ماكينة الفيزا واللي وصل على المحفظة أو إنستاباي، وقارنه باللي متسجل في البرنامج. فلوس كتير بتضيع هنا لأن محدش بيراجعها.
4. الخصم والمرتجع بموافقة
الخصم الكبير، والبيع بأقل من السعر، والمرتجع، يبقوا بموافقة المدير على العملية دي بالذات — مش موافقة مفتوحة لكل حاجة.
5. أي فلوس طالعة من الدرج تتسجل
مصروف بسيط زي شاي أو مواصلات لازم يتسجل كمصروف من الوردية، وماينفعش يطلع من الدرج أكتر من اللي فيه.
6. الآجل بحدود
البيع بالآجل يبقى للعميل اللي المدير حدّدله حد بس. من غير حد، الآجل بيتحول لفلوس ضايعة.
7. راجع التقرير كل يوم
خمس دقايق كل يوم على تقرير الورديات والخصومات والمرتجعات أحسن من مفاجأة آخر الشهر.
